Presenza-Opinión / Asia

Mesa para seis Por Xulio Ríos (AGN, 18/12/2006)

Estará disposto Pyongyang a abandonar agora as armas nucleares? Haberá encontro bilateral de Corea do Norte con Xapón, o máis severo na imposición de sancións? Ata onde cederá Washington para acadar un acordo? A volta ao diálogo é unha boa noticia, pero as expectativas de obtención de resultados concretos non son moi optimistas. (Foto: Diálogo hexagonal sobre Corea do Norte en Beijing. De esquerda a dereita, Sergey Ravoz (Rusia), Kim Kye-gwan (Corea do Norte), Chun Yung-woo (Corea do Sur), Kenichiro Sasae (Xapón), Christopher Hill (EEUU) e Wu Dawei (China)).   Esta semana se retoma na capital chinesa o diálogo hexagonal sobre Corea do Norte. Despois dun ano de estancamento, as seis partes (as dúas Coreas máis Xapón, Rusia, EEUU e China) regresan á mesa de negociacións para iniciar o que será a quinta rolda de conversas cun único asunto na orde do día: a aplicación da Declaración Conxunta aprobada o 19 de setembro do ano pasado coa que culminou a cuarta rolda. Desde 2003, cando deu comezo este diálogo, ata hoxe, a evolución do contencioso tivo os seus máis e os seus menos, se ben coidando sempre de que as altisonantes declaracións de uns e outros non afectasen ao mantemento do statu quo xeral. Non obstante, o ensaio nuclear realizado por Pyongyang en outubro pasado complica seriamente a situación. China, consciente dos efectos que lle podería deparar unha crise incontrolada na zona, actuou sempre como impulsora e árbitro das conversas. Pese a todo, nesta nova rolda afronta un reto difícil pois está en xogo a propia credibilidade da vía diplomática para que non todo se quede en falar por falar e se dean pasos significativos cara a desnuclearización da península coreana. Rusia apoia os esforzos chineses. Corea do Sur debátese entre a fidelidade a EEUU e uns intereses nacionais que reclaman o entendemento co Norte, sempre complexo. Xapón endureceu a súa postura, a sabendas de que un escenario belixerante favorece os propósitos “emancipadores” de Shinzo Abe. Na Declaración Conxunta, Corea do Norte comprometeuse a descartar toda intención de posuír armas nucleares, a renunciar ao actual programa nuclear e a aceptar a supervisión da AIEA. EEUU, pola súa banda, confirmaba que non tiña armas nucleares no Sur da península nin tampouco intención de atacar ou invadir o Norte. Pero estará disposto Pyongyang a abandonar agora as armas nucleares? Haberá encontro bilateral de Corea do Norte con Xapón, o máis severo na imposición de sancións? Ata onde cederá Washington para acadar un acordo? A volta ao diálogo é unha boa noticia, pero as expectativas de obtención de resultados concretos non son moi optimistas. Oficialmente, ninguén quixo poñer data á conclusión destas conversas. Segundo Qin Gang, portavoz de exteriores chinés, “a duración dependerá do seu desenvolvemento”. Máis incerteza non se pode pedir.

Xulio Ríos, director do Igadi.

Instituto Galego de Análise e Documentación Internacional www.igadi.org ÚLTIMA REVISIÓN: 18/12/2006 Fernando Pol

Subscríbete á lista de correo do Igadi e recibe notificación das novas informacións, artigos, documentos, convenios, publicacións, etc, que ofrece o Igadi na súa páxina web Igadi na Rede. Para comprender o Mundo desde aquí ... ... para proxectar a Galicia no contexto internacional.     Apúntate en: http://www.elistas.net/lista/igadi/alta