Presenza-Opinión / África
|
||||||||
Darfur e Khartum falan Xosé Luís Franco Grande (A Nosa Terra, 18/02/2010) |
||||||||
Darfur, rexión de tres estados federados dentro de Sudán, rebelouse en 2003 contra o goberno de Khartum porque coidaban seren marxinados por aquel e por opresión á poboación negra. A ONU mantén que o conflito custou 300.000 mortos e máis de 3.000.000 de desprazados. Como consecuencia dese conflito foi acusado o presidente, Omar al-Bashir, por crimes de guerra e de lesa humanidade, e o ano pasado a Corte Penal Internacional cursou contra el unha orde de arresto, o que, por agora, lle impediu viaxar a moitos países estranxeiros. O mesmo Omar al-Bashir acaba de anunciar que se chegou a un acordo co exército rebelde de Darfur, ao que tería contribuído de maneira moi significativa o veciño Chad, ata agora país inimigo de Sudán porque un e outro se acusaban de axudar a opostos grupos rebeldes. Ese acordo parece que tería o seguinte contido: 1) Cese das hostilidades entre Darfur e Khartum; 2) Conmutación dunhas cen penas de morte a membros do exército rebelde; 3) Retorno a Sudán dos refuxiados orixinados por ese conflito, e 4) Mellor reparto do poder e da riqueza. O acordo semella xustificar unha certa esperanza, se ben algúns pensan que, por estaren previstas en Sudán eleccións para abril, Al-Bashir forzou este acordo con fins electorais. De todas as maneiras, non parece que tal cousa lle importe moito a quen é por esencia corrupto e criminal. Sen dúbida que lle importa máis procurar unha mellor aparencia no exterior e resolver os seus problemas coa xustiza internacional. Pero unha certa esperanza non parece desavida. |
||||||||
Xosé Luís Franco Grande é escritor. |
||||||||
|
||||||||
Instituto Galego de Análise e Documentación Internacional www.igadi.org ÚLTIMA REVISIÓN: 01/03/2010
|
||||||||
|