Presentación do libro de Diego Sande Veiga “As políticas rexionais de innovación empresarial en Galiza”. Investigación gañadora do XXVI Premio Colmeiro

O Premio Manuel Colmeiro da Escola Galega da Administración Pública (EGAP) destaca anualmente traballos de investigación que teñan como obxecto a Administración pública de Galicia. No ano 2024 o xurado premiou o traballo de Diego Sande, profesor de Economía na Universidade de Santiago de Compostela así como Director do Diploma en Economía e Política China da mesma Universidade. É o Secretario do IGADI e coordenador da nosa Liña de análise e investigación en Economía. 

Xaneiro 30, 2026

Liñas de investigación Paradiplomacia Economía Unión Europea

Apartados xeográficos Acción exterior de Galicia

Palabras chave Economía Galicia Innovación

IGADI,

O Instituto Galego de Análise e Documentación Internacional (IGADI) é un think tank independente e unha asociación de estudos internacionais que nace en 1991 cun dobre propósito fundacional: reflexionar sobre os problemas e tendencias da sociedade internacional contemporánea e pular…

Trala entrega do Premio a Diego Sande o 16 de decembro do 2024 polo conselleiro de Facenda e Administración Pública, Miguel Corgos, e a directora da Escola Galega de Administración Pública (EGAP) Sonia Rodríguez-Campos, a investigación publicouse durante 2025. Pódese adquirir na Libraría institucional da Xunta e proximamente nas mellores librarías.

A obra premiada trata a problemática da eficiencia na planificación, deseño e implementación das políticas europeas de innovación rexional na Comunidade Autónoma, así como das dificultades na absorción de recursos europeos por parte do tecido produtivo.

A investigación é froito dunha sistemática atención á materia por parte de Diego Sande, precedida por distintos artigos académicos e dous libros previos, presentadas entre outros foros, na IGADI TV: “O estrangulamento tecnolóxico de Galiza” Edicións Laiovento 2020 e “As fugas de recursos, mito ou realidade colonialista en Galicia?” Universidade de Vigo 2024.

Na presentación do próximo mércores día 4 de febreiro ás 19:30 na Libraría Couceiro, acompañarán ao autor, a directora da Escola Galega de Administración Pública (EGAP), Sonia Rodríguez-Campos, e o profesor da USC e Director do IDEGA, Rubén Camilo Lois.