Presenza-Opinión Volver a TitularesVolver a Presenza/Latinoamérica/ Latinoamérica
Eleccións con nome de muller
Roberto Mansilla Blanco (Vieiros, 25/08/2009)

Versión para imprimir

 

Cómpre considerar o peso do factor feminino nas candidaturas para as eleccións presidenciais brasileiras previstas para outubro de 2010. A renuncia, a semana pasada, de Marina Silva, defensora ambiental da Amazonía, como membro do gobernante Partido dos Traballadores (PT) para anunciar a súa candidatura electoral polo Partido Verde, eleva a tres as candidatas electorais brasileiras para estes comicios, un feito inédito na política deste país.

Tras ser reelixido no 2006 e por vez primeira desde 1980, o presidente Lula da Silva non se presentará ás eleccións, escenario que abre un abano de posibilidades nas candidaturas tanto dentro do PT como da esquerda brasileira. O líder opositor José Serra, do PSMB, segue a liderar as enquisas, moi por riba da candidata elixida por Lula para o PT, a súa xefa de gabinete Dilma Roussef.

En terceira posición agarda a histórica líder da esquerda Heloísa Helena, expulsada do PT en 2003 por criticar a orientación económica do partido e que, dende entón, lidera unha plataforma de partidos de esquerda dispostos a ocupar o espazo tradicional do PT. Pero o fenómeno de Marina Silva pode engadir sorpresas nos próximos meses, incrementando as súas opcións presidenciais. Incluso, diversos analistas en Brasil especulan co posible apoio de Helena á candidatura de Silva.

De ser este o panorama, as eleccións presidencias dun país clave como Brasil, potencia emerxente no contexto global, esgrimirá un pulso entre Serra e dúas mulleres da esquerda, Roussef e probablemente Silva. Non obstante, a fragmentación da esquerda da conta das dificultades de Lula para cohesionar unha plataforma unitaria contra Serra, apoiado por diversos sectores económicos e quen pode aproveitar esta debilidade política da esquerda.

Neste sentido, a exemplar carreira política de Silva, superando diversos escollos sociais, o seu énfase cara o tema ambiental e un modelo económico máis igualitario, así como o atractivo electoral que pode supoñer a súa renuncia ao PT por diferenzas sobre o tratamento do tema amazónico, son elementos que poden provocar un traspaso de votos dentro das bases do PT cara súa candidatura, como medida de descontento con Roussef e a política económica de Lula.

De consolidar o eventual apoio de Helena e do seu partido PSOL, Silva converteríase na “bisagra” do proceso electoral presidencial e, con case toda probabilidade, nun actor clave dentro do panorama político brasileiro para os próximos anos.

Está Brasil a cambiar de paradigma político? O peso dos movementos sociais poden, igualmente, alterar o curso electoral e as prioridades políticas brasileiras cara un modelo socioeconómico máis humano, cun peso específico para o aspecto ambiental. Polo pronto, con Dilma, Heloísa e Marina como candidatas, o factor xénero imponse na política brasileira dentro dun proceso electoral con inconfundible nome de muller.

 
 

Roberto Mansilla Blanco,
analista do Igadi.

Roberto Mansilla Blanco, clic para aumentar
 
Volver a TitularesVolver a Presenza/Latinoamérica



Ir á páxina de inicio
Instituto Galego de Análise e
Documentación Internacional
www.igadi.gal

ÚLTIMA REVISIÓN: 25/08/2009


Subir

 

Subscríbete á lista de correo do Igadi e recibe notificación das novas
informacións, artigos, documentos, convenios, publicacións, etc, que ofrece
o Igadi na súa páxina web Igadi na Rede.


Para comprender o Mundo desde aquí ...
... para proxectar a Galicia no contexto internacional.

   

Apúntate en: http://www.elistas.net/lista/igadi/alta