O IGADI participou no Seminario en liña da Asociación Internacional de Estudos Galegos “Estudos Galegos no exterior: Propostas e debate para un diagnóstico”

O Seminario en liña realizado o pasado venres día 14 de xullo, dirixíase á comunidade da AIEG e ao público en xeral, no obxectivo de presentar os datos do diagnóstico arredor do estado dos Estudos Galegos no mundo, que a AIEG iniciou cunha enquisa electrónica lanzada no mes de marzo de 2023. Ademais da presentación dos datos, o Seminario quería abrir un debate que axude a profundizar no diagnóstico, aínda aberto e en proceso. O diagnóstico concluirase presumiblemente á altura do XIV Congreso Internacional da AIEG “Horizontes dos Estudos Galegos e/na Lusofonia” (17-20 de abril de 2024, Universidade do Minho). Participaron na actividade máis de 30 persoas desde Centros de Estudos galegos de máis dunha ducia de países.

Xullo 16, 2023

Palabras chave Paradiplomacia estudos galegos

No Seminario interviron presentando os datos Carlos Pazos-Justo (professor da Universidade do Minho, onde coordena o Centro de Estudos Galegos. Preside AIEG desde setembro de 2022), María Jesús Botana Vilar (profesora da Universidade do Algarve, onde dirixe o Centro de Estudos Galegos. Vicepresidenta da AIEG desde setembro de 2022.), Attilio Castellucci (Director do Centro de Estudos Galegos de Roma, que el mesmo fundou, dende 1999. Formou parte da antiga directiva da AIEG, na que agora ocupa un posto no consello científico) e Takashi Kakihara (profesor da Universidade Kwansei Gakuin. Ensina galego na Universidade de Osaka como profesor de tempo parcial. Membro da AIEG desde 2018.).

Daniel González Palau, como Director do IGADI, presentou o Seminario e conduciu o debate que pechou a actividade, subliñando a relevancia da AIEG como xermolo da actual Rede de Estudos Galegos no mundo, sendo así a maior rede de paradiplomacia académica e cultural de Galicia. Teimou na necesidade de incidir sobre as administracións públicas galegas e os partidos políticos para incorporar na axenda política a relevancia da Acción Exterior de Galicia, nun ano no que a Xunta prepara a nova Estratexia Galega de Acción Exterior 2023-2027 e o lanzamento do Observatorio da Lusofonía Paz Andrade, ambas ferramentas ligadas ao desenvolvemento da Lei de Acción Exterior de Galicia 10/2021 de 9 de marzo. É a primeira actividade conxunta entre a AIEG e o IGADI, desde a sinatura dun Acordo de colaboración en marzo deste 2023.

Podes partillar este contido mediante estes botóns