Foi sen dúbida o desafío máis serio para o inquilino do Kremlin dende que accedeu ao poder máximo en 1999. E abre un importante horizonte de incógnitas sobre o seu futuro político e a estabilidade do propio sistema de poder ruso, tanto dentro como fóra da propia Federación.
Haberá cambios bruscos no Ministerio de Defensa, na Rosgvárdia ou Garda Nacional e nos servizos de intelixencia? Tamén relevos inmediatos nas elites que conforman o sistema financeiro público ruso e nas empresas estatais mais relevantes? Moitos dedos apuntan a unha moi estendida corrupción como a lacra que abicha de vello o poder ruso. A ela levaban tempo apuntando as denuncias de Prigozhin no seu enfrontamento co liderado militar oficial representado polo ministro Serguéi Shoigú. Oficialmente só se admite a fin das accións xudiciais contra o xefe e os membros do grupo mercenario, ademais dunha oferta de incorporación parcial ás forzas armadas.
O desgaste de poder no Kremlin está pasando unha severa factura a Putin. Coa guerra en Ucraína sen moito menos resolver, a apertura dunha fronte importante de inestabilidade cae como auga de maio en Kíiv. O desconcerto xerado esta fin de semana pode ter un inocultable impacto no ánimo das tropas de choque que levan o peso da contenda na fronte bélica. O líder ruso está á defensiva.
No medio da crise, na capital rusa, autoridades políticas diversas expresáronlle a Putin o seu apoio. Dende o presidente do lexislativo Volodin ao líder comunista Ziuganov. Na oposición rusa exiliada, proliferaron os chamados a apoiar a Prigozhin, como o de Mijaíl Jodorkovski.
Aínda que moitos en Occidente dano xa por defenestrado, quizais un tanto apresuradamente á vista do seu historial de astucia, Putin ten unha oportunidade de reverter esta situación impulsando medidas serias e de longo alcance contra a corrupción que gangrena a dirixencia moscovita, medida que contaría co aplauso da poboación, poida que incluso da que vitorea a Prigozhin. Sen embargo, é dubidoso que a estas alturas dispoña da manga ancha que precisaría para facer rodar cabezas sen temer pola súa propia.