EEUU : Palabra chave

Mentres continúan os ataques e se abren —cando menos en aparencia— canles de mediación, a guerra entre Irán, Estados Unidos e Israel non se está a librar unicamente no plano militar. Cada actor tenta impor a súa propia interpretación do conflito, non só para consolidar posicións internas, senón para condicionar o resultado político de calquera eventual negociación. Máis ca unha guerra cun desenvolvemento lineal, estamos ante unha confrontación na que coexisten relatos diverxentes sobre que está a acontecer, quen está a gañar e que significaría realmente o final do conflito.

Tres semanas despois do inicio da ofensiva de Estados Unidos e Israel contra Irán, o conflito entrou nunha nova fase marcada pola persistencia do réxime iraniano, a intensificación dos ataques selectivos e unha crecente rexionalización que afecta directamente ao Golfo e ao Líbano. Lonxe de provocar un colapso interno, a guerra está a reconfigurar os equilibrios políticos, enerxéticos e sociais en Oriente Medio, mentres Europa permanece nunha posición reactiva e incapaz de artellar unha saída diplomática propia.